-कात्यायनी
पहिलेपहिले म वर्षमा केवल दुई दिन
१५ अगस्ट र २६ जनवरीमा
देशभक्त हुने गर्थें
आजभोलि म हरेक दिन देशभक्तिको
झरीमा लछप्पै भिजिरहन्छु
कार्यालयमा हरदम
मालिकको नजरमा
कसरी पर्ने भन्ने तरिकाहरु सोच्छु
छिमेकीसँग जल्ने र उसलाई जलाउने
कारण खोजिरहन्छु
जवान हुँदै गरेको छोरामाथि शङ्का गरिरहन्छु
र छोरीमाथि नयाँ-नयाँ पहरा दिने
उपाय खोजिरहन्छु
गुन्डाहरु, सरकार र पुलिससँग डराउँदै
शालीन तरिकाले जिन्दगी बिताउँछु
र, चाहन्छु कि कमसेकम
केही मानिसहरू यस्ता होउन्
जो मसँग डराउन्।
हडताल, सडक जाम, अशान्ति र
कुरैपिच्छे तर्क गर्नेहरूलाई
म घृणा गर्छु।
कार्यालयबाट फर्केर श्रीमतीलाई
पकौडी तार्न लगाउँछु
टीभीको रिमोट हातमा लिएर
देश-दुनियाँको जानकारी लिन्छु
र हाँस्यव्यङ्ग्य कार्यक्रम हेर्छु ।
हो, यस्तो एउटा कठिन समयमा पनि म
एउटा कर्तव्यनिष्ठ नागरिक जसरी जिउँछु
र नागरिक खुशीलाई
एउटा नयाँ अर्थ दिन्छु।
----
नेपाली अनुवाद: Pramod Dhital
