बुटवल। बुटवल उपमहानगरपालिकाद्वारा सञ्चालित सुरक्षित आप्रवासन (सामी) कार्यक्रमअन्तर्गत २१ दिने वित्तीय साक्षरता तथा मनोसामाजिक परामर्श तालिम सम्पन्न भएको छ । कार्यक्रमको समापन गर्दै बुटवल उपमहानगरपालिकाकी उपप्रमुख सावित्रा देवी अर्यालले सहभागीहरुलाई प्रमाणपत्र वितरण गरेकी हुन् ।
समापन समारोहलाई सम्बोधन गर्दै उपप्रमुख अर्यालले सकेसम्म विदेश पलायन नहुन आग्रह गर्दै आफ्नै देशमा परिवारसँग मिलेर मेहनत गरे विदेशसरह आम्दानी गर्न सकिने बताइन् । उनले सानो–सानो बचतबाट आर्थिक अनुशासनको शुरुआत गर्न सहभागीहरुलाई आग्रह गरिन् ।
“विदेश नै जीवनको अन्तिम विकल्प होइन, यहीँ अवसर खोजेर श्रम गरे आत्मनिर्भर बन्न सकिन्छ,” उनले भनिन् ।
यसैगरी बुटवल उपमहानगरपालिकाका प्रमुख प्रशासकीय अधिकृत दिपक ज्ञवालीले २१ दिने तालिमले सहभागीहरुलाई व्यवहारिक ज्ञान, आर्थिक सचेतना तथा आत्मविश्वास बढाउन महत्वपूर्ण सहयोग पुगेको बताए । उनले यस्ता कार्यक्रमले सुरक्षित वैदेशिक रोजगारी, वित्तीय व्यवस्थापन तथा सामाजिक सचेतनामा सकारात्मक प्रभाव पार्ने उल्लेख गरे ।
कार्यक्रममा बुटवल उपमहानगरपालिकाका दुई सयभन्दा बढी सहभागीहरुको सहभागिता रहेको थियो । तालिमअन्तर्गत वित्तीय साक्षरता, बचतको महत्व, वैदेशिक रोजगारीका चुनौती तथा मनोसामाजिक परामर्शसम्बन्धी विषयमा प्रशिक्षण प्रदान गरिएको थियो ।
कार्यक्रम बुटवल उपमहानगरपालिकाको आयोजनामा सम्पन्न भएको हो ।
