बुटवल । देशमा जेनजी आन्दोलनपछि विकसित नयाँ परिस्थितिबारे पार्टीको नयाँ धारणा सार्वजनिक गर्न नेकपाले कार्तिक २० गते काठमाडौंमा विशाल जनसभा गर्ने निर्णय गरेको छ ।
विशाल जनसभालाई नेकपाका महासचिव विप्लवलगायत विभिन्न शीर्ष नेताहरु, वाम तथा देशभक्त बुद्धिजीवीहरुले सम्बोधन गर्ने कार्यक्रम रहेको छ । २००७ सालको प्रजातान्त्रिक आन्दोलनलाई दिल्ली सम्झौतामार्फत् धोका दिएपछि विद्यार्थी आन्दोलनका क्रममा सहादत प्राप्त गरेका सहिद चिनियाँकाजी श्रेष्ठ स्मृति दिवसको सन्दर्भमा नेकपाले जनसभा गर्ने तयारी गरेको हो ।
नेकपाको केहीदिन अगाडी बसेको विशेष केन्द्रीय समितिको बैठकले नेपालमा संसदीय व्यवस्थाको औचित्य समाप्त भएको, नेपाली विशेषताको समाजवादको आधार तयार भएको, अमेरिकी भूमण्डलीकृत साम्राज्यवाद र उसले परिचालन गरेको दलाल र नेपाली जनताबीच मुख्य अन्तरविरोध रहेको, नेपालको स्वाधीनता, अखण्डता सर्वाधिक खतरामा भई देश युक्रेन र सिरियाको बाटोमा अगाडी बढेकोले नेपाल नयाँ राजनीतिक कोर्षमा प्रवेश गरेको निष्कर्ष निकालेको थियो ।
जनसभामा दशौं हजार जनताको सहभागिता रहनेछ भने सामना सांस्कृतिक परिवारको क्रान्तिकारी र देशभक्त गीतसंगीतहरुको प्रस्तुति समेत रहनेछ । यसअघि नेकपाले विभिन्न संघर्षको कार्यक्रमहरु समेत तय गरेको छ ।
