बुटवल । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टी (नेकपा) को केन्द्रीय समिति बैठक केन्द्रीय कार्यालय कपिलवस्तुको शिवगढीमा आजबाट सुरु भएको छ ।
बैठकमा महासचिव विप्लवले “विशिष्ट परिस्थिति, विशेष कार्यभार” शीर्षकको राजनीतिक प्रतिबेदन प्रस्तुत गर्नुभएको छ ।
प्रतिबेदनमा हालको राजनीतिक परिस्थिति, जेन–जी विद्रोहका कारण, परिणाम र सम्भावना, देशको राजनीतिक निकासका लागि वैकल्पिक एजेन्डा, पार्टी एकता, आगामी निर्वाचनको तयारी तथा राजनीतिक, आर्थिक र सांस्कृतिक दिशाबारे पार्टीको धारणा समेटिएको जनाइएको छ ।
पार्टीका केन्द्रीय सदस्यहरूले भोलिदेखि महासचिव विप्लवद्वारा प्रस्तुत प्रतिबेदन तथा प्रस्तावहरूमा विस्तृत छलफल सुरु गर्ने कार्यक्रम रहेको छ ।
देशको बैकल्पिक शक्तिको दावी गर्ने नेकपाको यस बैठकलाई राजनीतिक वृतमा विशेष चासोका साथ हेरिएको छ ।
बामपन्थी एकता र आगामी निर्वाचनमा साझा रणनीति तय गर्ने सन्दर्भमा यो बैठक ऐतिहासिक हुने अपेक्षा गरिएको छ ।
यसअघि स्थायी समिति बैठकमार्फत एजेन्डा तय गरिएको थियो ।
