दलितमाथि दुर्व्यवहार गर्नेलाई कालोमोसो र जुत्ताको माला

भण्डारीद्धारा दलितमाथि पटक–पटक दुर्व्यवहारको आरोप

दलितमाथि दुर्व्यवहार गर्नेलाई कालोमोसो र जुत्ताको माला

बैशाख ६, नवलपुर । नवलपुरमा कथित दलित जातीको नाममा दुर्व्यवहार र भेदभाव गर्नेलाई स्थानीयले कालोमोसो र जुत्ताको माला लगाएको समाचार प्राप्त भएको छ । 

आइतबार नवलपुर जिल्लाको मध्यविन्दु वडा नं. ९ मा बस्दै आएका बिष्णु भण्डारीलाई स्थानीय गाउँले जनता उठेर कालोमोसो र जुत्ताको माला लगाएर गाउँ घुमाएको बताइएको छ । गाउँमा पटक–पटक दलित समुदायमाथि विभेद, अपमान र दुर्व्यवहार गर्दै आएको आरोपमा भण्डारीलाई कालोमोसो र जुत्ताको माला लगाएर गाउँ घुमाएको स्थानीयले बताएका छन् । 

पछिल्लो पटक भण्डारीले नयाँ बर्षको अवसरमा आयोजित वनभोज कार्यक्रममा मध्यविन्दु ९ निवासी दीपक विश्वकर्मामाथि दुर्व्यवहार गरेको बताइएको छ ।

सामूहिक वनभोज कार्यक्रममा भण्डारीले “विश्वकर्मालाई किन बोलाएको ? यसले छोएको खान हुन्न” भन्दै सार्वजनिक स्थानमा दुर्व्यवहार र अपमान गरेको बताइएको छ । भण्डारीले स्थानीयमाथि कथित दलित जातीको नाममा विभेद, अपमान र दुर्व्यवहार गर्दै आएको बताइएको छ ।