बुटवल उद्योग वाणिज्य संघ रुपन्देहीमा रक्तदान कार्यक्रम

बहुउद्देश्यीय भवन निर्माणको लागि खरिद गरिएको जग्गामा बोर्ड अनावरण

बुटवल उद्योग वाणिज्य संघ रुपन्देहीमा रक्तदान कार्यक्रम

फागुन ९, बुटवल । बुटवल उद्योग वाणिज्य संघ रुपन्देहीमा रक्तदान कार्यक्रम भएको छ । संघको ६८ औं स्थापना दिवसको अवसरमा आईतबार संघको सचिवालय परिषर बालमन्दिरमा रक्तदान गरिएको हो ।

बुटवल उद्योग वाणिज्य संघ रुपन्देहीको २०१० साल फागुन १० स्थापना भएको थियो । रक्त सञ्चार सेवा केन्द्र बुटवलको प्राबिधिक सहयोगमा भएको रक्तदान कार्यक्रममा ५० जनाले रक्तदान गरेको संघले जनाएको छ ।

रक्तदान कार्यक्रमको सुभारम्भ गर्दै संघका अध्यक्ष खिमबहादुर हमालले संघले स्थापना दिवसमा रक्तदान कार्यक्रम गर्दै आएको र आगामी दिनमा पनि निरन्तरता दिने विश्वास व्यक्त गर्नुभयो । कार्यसमिति सदस्य भेषराज गैरहेको संयोजकत्वमा भएको कार्यक्रममा संघका पूर्व अध्यक्षहरु, पदाधिकारी तथा कार्यसमिति सदस्यहरु तथा साधारण सदस्य उद्योगी व्यवसायीहरुको सहभागिता रहेको थियो ।

रक्तदान गर्ने रक्तदाताहरुलाई त्यसै अवसरमा प्रमाणपत्र समेत प्रदान गरिएको थियो । संघले स्थापना दिवसको अवसरमा साँझ सचिवालयमा दीपावली कार्यक्रम समेत राखेको छ भने स्थापना दिवसकै अवसरमा पूर्वअध्यक्ष सम्मान तथा बुटवल माध्यमिक विद्यालयलाई डेस्क बेन्च प्रदान गर्ने कार्यक्रम समेत राखेको छ ।

बहुउद्देश्यीय भवन निर्माणको लागि खरिद गरिएको जग्गामा बोर्ड अनावरण

बुटवल उद्योग वाणिज्य संघ रुपन्देहीले बहुउद्देश्यीय व्यवसायिक भवन निर्माणको लागि बुटवल उपमहानगरपालिका वडा नं. १५ सेमलारको चम्किपुरमा खरिद गरेको जग्गामा बोर्ड अनावरण गरिएको छ ।

संघको ६८ औं स्थापना दिवसको अवसरमा उक्त जग्गामा आईतबार बोर्ड अनावरण गरिएको हो । संघले बहुउद्देश्यीय व्यवसायिक भवन निर्माणको लागि सेमलारको चम्किपुरमा ७ कठ्ठा जग्गा खरिद गरेको थियो । उक्त जगगामा संघका अध्यक्ष खिमबहादुर हमाल सहित निवर्तमान अध्यक्ष महेशमान सिंह, पूर्व अध्यक्षहरु सुरेन्द्रप्रसाद श्रेष्ठ, निर्मलप्रसाद लाकौल, कुशप्रसाद मल्ली, अर्जुनमान सैंजु र जीवनप्रसाद वझाले संयुक्त रुपमा बोर्ड अनावरण गर्नुभएको हो ।

त्यस अवसरमा संघका पदाधिकारी, कार्यससिमिति सदस्यहरु, बस्तुगत समितिका पदाधिकारी, उद्योगी व्यबसायीको सहभागिता रहेको कार्यक्रम संयोजक प्रतिक पोखरेलले जानकारी गराउनु भयो ।

संघले लिएका लक्ष्य परिपूर्तिको लागि बहुउद्देश्यीय भवन निर्माण गरिने र त्यसमा बिशेषगरी कृषिलाई प्राथमिकता दिईने संघका अध्यक्ष हमालले जानकारी गराउनु भयो । जग्गा खरिदको लागि संघका निवर्तमान अध्यक्ष सिंहको संयोजकत्वमा समिति गठन गरिएको थियो । उक्त समितिले बिभिन्न स्थानमा जग्गाको अवलोकन तथा अध्ययन गरेर उक्त जग्गा छनौट गरेको थियो । संघले निकट भविश्यमै पूर्वाधार निर्माणको काम सुरु गर्ने महासचिव दिनेशप्रसाद श्रेष्ठले जानकारी गराउनु भयो ।