घर बहाल र व्यवसाय कर छुट गर्न बुटवल उद्योग वाणिज्य संघको माग

बुटवलमा अन्तरक्रिया कार्यक्रम

घर बहाल र व्यवसाय कर छुट गर्न बुटवल उद्योग वाणिज्य संघको माग

बुटवल : बुटवल उद्योग बाणिज्य संघ रुपन्देहीले सडक विस्तारको क्रममा भत्काईएका घरधनीलाई घरबहाल कर र ती घरमा व्यवसाय गरेका व्यवसायीलाई व्यवसाय कर छुटको माग गरेको छ । 

संघमा मंगलबार आयोजना गरिएको अन्तरक्रिया कार्यक्रममा संघको तर्फबाट अवधारणा प्रस्तुत गर्दै अध्यक्ष उज्ज्वलप्रसाद कसजूले कोभिड–१९ महामारीको कारण अफ्ठ्यारोमा परेका व्यवसायीलाई सडक विस्तारको क्रममा सडकसंगै रहेका मुख्य राजमार्गका घर भत्काईएका कारण व्यवसायी समेत ठप्प भएकोले व्यवसाय कर छुट गर्न माग गर्नुभयो । त्यस्तै गरी निर्माणको अवधिमा बहालसमेत नउठ्ने भएकोले घर बहाल कर समेत छुट गर्नको लागि उहाँले बुटवल नगरपालिकासंग आग्रह गर्नुभएको हो । 

बुटवल–वेलहीया व्यापारिक मार्ग अन्तरगत पर्ने बुटवलको चौराहा–चिडियाखोला सडक पर्ने घर भत्काईएको कारण अहिले चौराहादेखि गोलपार्कसम्मको मुख्य राजमार्गमा भएका व्यापार व्यवसाय बन्द रहेका छन् । घर भत्काएको समयदेखि पुरा नहुँदा सम्मको घर बहाल कर र व्यवसाय कर छुटको लागि बुटवल उद्योग बाणिज्य संघ रुपन्देहीले नगरपालिकासंग माग गरेको हो । 

त्यस्तैगरी उक्त सडक खण्डमा सडकको दुबैतर्फको सर्भिसलेन १८ फूटबाट बढाएर २७ फूट कायम गर्न समेत आग्रह गरिएको छ । सडकको संरचनामा थोरै मात्रै सुधार गर्दा कतै कसैलाई पनि असर नपर्ने र व्यापार व्यवसायको लागि समेत सहज हुने भएकाले संघले सर्भिसलेनको चौडाई बढाउन आग्रह गरेको हो । त्यस्तैगरी कार्यक्रममा ८२ फूट कायम रहेको सडकमा घरधनीहरुले ८२ फूटमा पिल्लर राखिसकेकोले सटरको छज्जा मात्रै भएपनि राख्ने व्यवस्था मिलाईदिन समेत आग्रह गरिएको थियो ।अध्यक्ष कसजूले बुटवललाई स्मार्ट सिटी बनाउने योजना अनुसार मुख्य राजमार्गमा रहेका घरहरु एउटै रंगको बनाउने व्यबस्था मिलाउन र एउटै रंग बनाउँदा हुने खर्चको समेत नगरपालिकाले व्यबस्था मिलाउन आग्रह गर्नुभयो । 

त्यस अवसरमा बोल्दै सडक डिभिजन कार्यालय बुटवलका डिभिजन प्रमुख जयलाल मरासिनीले सडक ऐन २०३१ अनुसार मुख्य राजमार्गमा सडकको केन्द्रबाट दुबैतर्फ २५ मिटर कायम हुनुपर्ने भन्दै सोही अनुसार गर्नको लागि आग्रह गर्नुभयो । त्यसमा व्यबसायीहरुले माग गरे अनुसार सर्भिसलेनको चाढाई केही बढाउने गरि कन्सल्टेन्ट नियुक्त गरेर रि–डिजाईनको काम भईरहेको समेत जानकारी गराउनु भयो । 

अन्तरक्रिया कार्यक्रममा बुटवल वडा नं. ८ का अध्यक्ष भिमबहादुर श्रेष्ठ, ४ का अध्यक्ष टंकप्रसाद पराजुली, ६ का अध्यक्ष जगदिश आचार्य, ९ का सदस्य शिव अधिकारी, ३ की सदस्य सरस्वती कुवँरले घरबहाल छुटको लागि वडामा निवेदन दिन आग्रह गर्नुभएको थियो । त्यस्तैगरी व्यबसायी कर छुटको लागि पनि नगरपालिकामा पहल गर्ने प्रतिवद्धता व्यक्त गर्नुभयो । कार्यक्रम महासचिव बिमलराज भट्टराईको सञ्चालन र सचिव मुक्ति अधिकारीको धन्यवादमा भएको थियो । कार्यक्रममा सरोकारवालाको समेत सहभागिता रहेको थियो ।