मार्क्सवादी सांस्कृतिक मोर्चाद्धारा प्रतिरोध अभियान 

स्रष्टाहरुद्धारा वैज्ञानिक समाजवादी क्रान्तिको उद्घोष

मार्क्सवादी सांस्कृतिक मोर्चाद्धारा प्रतिरोध अभियान 


पुष २९, बुटवल । मार्क्सवादी सांस्कृतिक मोर्चाले राजनीतिक प्रतिगमका विरुद्ध प्रतिरोध सांस्कृतिक अभियान सुरु गरेको छ । यस मोर्चाले आजै माइतिघर मण्डलाबाट वैज्ञानिक समाजवादी क्रान्तिको उद्घोषसहित उक्त अभियान सुरु गरेको हो ।

‘राजनीतिक प्रतिगमका विरुद्ध अग्रगमनमा पक्षमा प्रतिरोध सांस्कृतिक अभियान’ नाम दिइएको उक्त अभियानमा लेखक, कवि, कलाकारको उल्लेख्य उपस्थिति रहेको थियो ।

प्रधानमन्त्री केपी ओलीले प्रतिनिधि सभा भङ्ग गरी मध्यावधी निर्वाचनको घोषणा गरेपछि कवि, कलाकार र नागरिक समाज प्रतिगमनका विरुद्धमा सङ्घर्षमा छन् । यही मेलोमा भर्खरै गठन भएको ‘माक्र्सवादी सांस्कृतिक मोर्चा’ पनि सडकमा निस्किएको छ ।

अरूहरूजस्तै तपाईंहरू पनि प्रतिगमनका विरुद्ध भन्दै सडकमा निस्किनु भएछ, तपाईहरू पनि संसद पुनस्र्थापनाको पक्षमा हो कि भन्ने प्रश्नमा उक्त मोर्चाका संयोजक इस्मालीले हामी कहाँ संसद पुनस्र्थापनाका लागि सडकमा आएको हो र भन्दै उक्त कुरा ठाडै अस्वीकार गरे ।

उनले अगाडि थपे, ‘हामी प्रतिगमनको विरोधका लागि मात्र सडकमा निस्किएको हैन । सङ्घीय जनगणतन्त्र र वैज्ञानिक समाजवादी व्यवस्थाको पक्षमा पो निस्किएका हाैँ ।’

केही दिन पहिले वैज्ञानिक समाजवादी क्रान्तिको अपरिहार्यतालाई आत्मसात् गर्दै समाजवादी यथार्थवाद र सांस्कृतिक क्रान्ति पक्षधर संस्कृतिकर्मीको साझा मञ्च ‘मार्क्सवादी सांस्कृतिक मोर्चा’ निर्माण गरिएको वक्तव्य सार्वजनिक भएको थियो ।

विरोध कार्यक्रममा विमल निभा, भुपाल राई जगदीशचन्द्र भण्डारी, विष्णु भण्डारी, शकुन्तला जोशी, बलराम तिमिल्सिना, मित्रलाल पंज्ञानी, वसन्त वोगटी, कृष्णहरि भट्ट, महावीर विश्वकर्मा, राजु स्याङ्तान, गौरी दाहाल, सुनिता बुढाथोकी लगायतले कविता वाचन गरेका थिए ।

कार्यक्रमका एक मात्र वक्ता वरिष्ट सौन्दर्य चिन्तक निनु चापागाईंले मन्तव्य राखेका थिए । बोल्ने क्रममा उनले भने ‘संघीयता विरोधी, समानुपातिक प्रतिनिधित्व र गणतन्त्र विरोधी देशी विदेशी शक्तिहरूको साँठगाठको परणिाम आजको प्रतिगमन हो ।’

उनले अगाडि थपे, ‘यो धेरै गम्भीर विषय हो । जबसम्म शासकहरूको बिचमा साँठगाठ हुने, देशी विदेशी शक्तिहरूले देशलाई शोषण गर्ने र साशन गर्ने षड्यन्त्र गरिरहन्छ त्यतिखेरसम्म हामीले यी कुराहरू बारम्बार भोग्नुपर्ने स्थिति हुनसक्छ ।

त्यसकारण पनि हामी बहुमतले अल्पमतमाथि शासन गर्ने दिनहरू ल्याउन, जनगन्त्रणका दिनहरू ल्याउन सङ्घर्षमा जान, अग्रगमनमा पक्षमा रहन आवश्यक छ ।’

संयोजक इस्मालीको अध्यक्षतामा सम्पन्न भएको उक्त कार्यक्रमको सञ्चालन कवि विष्णु भण्डारीले गरेका थिए । इस्मालीले मोर्चाको प्रेश वक्तव्य वाचन गरेका थिए ।

प्रेश वक्तव्यमा नेपाली समाजको आजको अन्तर्विरोध तथा नेपाली जनताले भोगिरहेका आजका समस्याको समाधान यस व्यवस्थाबाट हुन सक्दैन भनिएको छ । वक्तव्यमा अगाडि भनिएको छ, ‘वर्तमान फासीवादी चरित्रको पुँजीवादी संसदीय व्यवस्थाको विकल्पका रूपमा सङ्घीय जनगणतन्त्र र वैज्ञानिक समाजवादी व्यवस्थाको निर्माणबाट मात्र यो सम्भव छ ।’

मोर्चाले राजनीतिक प्रतिगमनको विरोध गर्दै जनवादी/वैज्ञानिक समाजवादी विकल्प निर्माणको यात्रामा मोर्चावद्ध हुन प्रगतिशील, लोकतान्त्रिक र अग्रगमनका पक्षधर संस्कृतिकर्मीहरूलाई एकतवद्ध हुन आह्वान समेत गरेको छ ।


नेपाली साहित्यघर